MANILA Phiippines – Nagnubo basi sa bag-o nga rekord ang Philippine peso, kontra sa US dollar sa tunga sang tensyon sa Middle East.
Base sa datos sang Bankers Association of the Philippines (BAP), ang peso nagsirado sa P59.50 tubtob $1 sa katapusan sang trading.
Kadungan man sang pagnubo sang piso tubtob sa P59.71 ang intraday trading.
Sa kasaysayan sang trading sang piso, nahibaluan nga mas manubo ini kumpara sa nauna nga record nga P59.46 sang Enero 15, samtang antes sang pag-atake sang United States kag Israel batok sa Iran sang katapusan sang Pebrero, yara pa ang peso sa sunod-sunod nga pag-baskog nga nagbalik sa P57.51 sang Pebrero 25.
Lakip pa sa palaabuton nga epekto sang paghina sang piso amo ang posible nga pagsaka sang presyo sang lana bangod ginabakal ini sa dolyar kag ang posibleng pagdugang sang kabug-atan sa utang panlabas sang pungsod.
Nahibaluan sa ginpahayag ni President Ferdinand Marcos Jr., nga indi niya gusto nga malab-ot sang piso ang P60 kontra sa dolyar, samtang naganubo ang value sang Philippine Stock Exchange Inc. Index sang 4.97% sa trading kag maga-apekto sa pila ka dako nga kompanya pareho sang Bank of the Philippine Islands, SM Investments Corporation, Ayala Corporation kag SM Prime Holdings.
