Kadungan sang halit sang Bagyo Uwan, nagpanawagan ang pila ka animal welfare groups nga indi pagkalimtan ang kaluwasan sang mga hinuptanan.
Sa idalom sang kampanya nga “No Pets Left Behind”, ang mga organisasyon kaangay sang PETA Asia nagpahanumdom sa publiko nga ilakip ang mga hinuptanan sa ila mga plano sa pagbakwit.
Suno sa ila, importante nga ihanda ang pet emergency kit nga may unod nga pagkaon, tubig, bulong, leash, kag carrier agud masiguro ang safety sang mga kasapatan.
Ginhatagan pagtamod man sang grupo nga indi dapat pabay-an ang mga hinuptanan nga sapat nga nakahigot ukon nakakandado sa balay, ugsaran, ukon atop bangud sa risgo sang pagbaha kag mabaskog nga hangin.
Dugang pa sang mga animal welfare advocates, dapat bukas ang mga evacuation centers kag handa sa pagbaton sang mga hinuptanan agud malikawan ang mga ini nga mabulag sa ila pamilya.
Nagpanawagan ang mga grupo sa gobyerno kag lokal nga otoridad nga ilakip ang mga kasapatan sa rescue kag disaster response, bangud kabahin sila sang tagsa ka komunidad.
