ROXAS CITY – Ginbaha ang pila ka mga kabarangayan kasunod sang mamunog nga ulan sa banwa sang Pres. Roxas, Capiz.
Ini ang ginpahayag ni Pres. Roxas Mayor Receliste Tanoy Escolin sang mainterview sang Bombo Radyo.
Suno kay Escolin nga pila ka mga barangay sa ila banwa ang apektado bangud sa pila ka oras nga pag-ulan rason nga hinali na lamang nga nagtaas ang lebel sang tubig.
Kalakip sa nalubog sa tubig baha amo ang Barangay Aranguel, Bayuyan, Badiangon, Cabugcabug, Poblacion kag Pantalan sang amo nga banwa.
Bangud diri, nagapanawagan si Escolin sa talatapan sang Department of Public Works and Highways nga kuntani mahatagan na sang sabat kag matapos na ang mga proyekto kapareho sang drainage system kag flood control agud indi na pagtunaan sang pagbaha.
Magluwas diri, ginatinguhaan gid sang amo nga alkalde nga mapalab-ot sa office of the Civil Defense ang amo nga problema agud matutukan sang DPWH ang masami nila nga problema sa tagsa ka magbubo ang mabaskog nga ulan.
Samtang, ginpahayag naman ni Escolin nga nagdonar sang P20 milyones si Senator Grace Poe sa ila banwa para sa pagpakaayo sang mga drainage system humalin sa Barangay Poblacion padulong sa Pantalan.
Apang, gin-athag sini nga ang nasambit nga pondo ang direkta nga gindownload sa DPWH kag indi sa lokal nga gobyerno sang nasambit nga banwa.
