ROXAS CITY – Nagapati ang pila ka mga Pinoy sa Canada nga makabangon gikan sa kapierdihan ang defending champion nga Golden State Warriors sa Game Two sang NBA Finals batuk sa hubon sang Toronto Raptors.
Ini ang ginpahayag ni Bombo international correspondent Rochelle Paler, tumandok sang Barangay Mangoso, Sigma, Capiz kag nakaba-se sa karon sa Oshawa, Ontario, Canada sang mainterview sang Bombo Radyo Roxas.
Suno kay Paler, apisar ginpahayag sang pila ka mga eksperto nga mabudlayan ang Warriors sa ila nga handom para sa three-peat championship, indi man suno sa iya sang basta-basta ang championship experience sang hubon kun ikomparar sa Raptors nga subong pa lamang nakaabanse sa NBA finals sa ila nga kabug-usan nga franchise history.
Apang sa karon suno kay Paler, tuman nga malipayon ang mga Canadians bangud sa labing una nga kahigayunan nga pagkasulod sang Raptors sa NBA Finals kag maswerte pa nga nalutos sini ang hubon sang Warriors sa Game One.
Mahibaluan nga pagapiliton sang Warriors nga mapatas ang Game Two apisar may homecourt advantage ang ila kasumpong nga Raptors.
