ROXAS CITY – Magapasalamat ang pila ka mga miyembro sang Pantawid Pamilyang Pilipino Program ukon 4P’s kun magtupa ang dugang nga P500 nga ayuda kada bulan nga ginaplano nga ihatag sang gobyerno.
Ini bangud suno sanday “Marlyn” kag “Emmavic” mga vendor sang TATC, nga makapiyan-piyan pa ini nga kantidad para sa ila nga galastuhanon ilabi na sa pagkaon.
Apang, kun panumdumon lang, kulang kuntani ini, bangud sa isa palang ka adlaw ginapaigu-igo na ni “Marlyn” ang P300 nga pambakal sang bugas kag sud-an agud makakaon ang bilog nila nga pamilya.
Pasalamat man si Maribel Dapulasa kun madugangan ang ila ginabaton sa gobyerno, apang nagapati ini nga indi dapat maghulat nalang kag pagsaligan ang amu nga ayuda, sa baylo, magpangita sang iban nga legal nga trabaho nga makaangkon sang extra income.
Nakadepende man suno diri sa tawo kun magtinamad ini sa kabuhi, apang aminado ini nga may mga nagtinamad na nga benipisyaryo sang 4P’s.
Nahibaluan nga nagabaton ang mga nasambit nga vendor sang kapin P3800 kada pay-out sang programa.
