Gintumod sang China’s Ministry of National Defense ang Pilipinas nga ginaalegar ginahalinan sang gamo kag katalagman sa West Philippine Sea (WPS).
Kasunod ini sang dugang nga commitment sang pungsod sa maritime security kag pag-alyansa sa mga kaiping nga pungsod sa rehiyon.
Suno kay Senior Colonel Zhang Xiaogang sang defence ministry sang China, ilegal ang pag-okupar sang Pilipinas sa Kalayaan Island Group, kag ginabasol ang pungsod sa pagdugang sang tensyon paagi sa maritime patrols kag presensya sa kadagatan.
Ini bilang sabat sa bag-o lang nga pahayag ni Defence Secretary Gilberto Teodoro Jr., nga ang Armed Forces of the Philippines magasaylo sang ila pokus halin sa internal security pakadto sa external defense—ilabi na nga wala naga-untat ang agresibo nga aksyon sang China sa WPS.
Ginpanindugan ni Teodoro nga ang nine-dash line claim sang China ang batok sa international law, kag nagpasalig nga ipakigbato sang administrasyon ni Marcos Jr ang kinamatarong sang pungsod sa kadagatan.
Sa pihak nga bahin, nagpaandam ang China nga magahimo ini sang hugot nga mga tikang kon magpadayon ang mga probokasyon sang Pilipinas.
Sa pihak sini, padayon nga ginapanindugan sang Pilipinas ang validity sang 2016 arbitral ruling nga nag-invalidate sang malapad nga claims sang China sa South China Sea.
