Nagpirma ang Pilipinas kag Cambodia sa walo ka kasugtanan agud pabaskugon ang kaangtanan sa negosyo, agrikultura, edukasyon, turismo, kag teknolohiya, kadungan sang bilateral meeting nanday Presidente Ferdinand R. Marcos Jr. kag Punong Ministro Hun Manet sa Malacañang.
Kalakip sa mga kasugtanan ang eliminasyon sang doble nga pagbuhis agud mapahagan-hagan ang palas-anun sang mga manugpuhunan, pati man ang pagpabaskog sang kompetisyon sa negosyo kag pagbayluhanay sang ihibalo sa investment promotion.
Ginpirmahan man ang memorandum of understanding (MOU) sa Agrikultura kag Agribusiness agud maayos ang mga plano sa agrikultura kag pasanyugon ang international trade sa sektor.
Suno kay Marcos, importante nga yara ang Cambodia nga makabulig para sa siguridad sa pagkaon.
Ginpabaskog man ang Technical Vocational Education and Training (TVET), turismo (2024-2028), kag digital transformation sa gobyerno, nga magapadali sa pagbayluhanay sang ihibalo kag teknolohiya.
Magluwas diri, ginpirmahan man ang memorandum of understanding (MOU) sa Proteksyon sang Yamang Kultural batuk sa pagpangawat kag iligal nga pagbaligya.
Gin-eksplekar man ni Marcos ang kumpiyansa nga mangin resulta sang kasugtanan nga ini sang mas mabakod nga relasyon kag mas madamu nga oportunidad para sa pareho nga pungsod.
