Ginkilala sang International Data Corporation Singapore (IDC) ang Philippine Rice Information System (PRiSM), ang pinakauna nga satellite-based rice monitoring system sa Southeast Asia.
Gingawad sang IDC ang Special Award for Sustainability sa nasambit nga teknolohiya nga ginagamit sang pungsod sa pagmonitor sa epekto sang bagyo, mabunok nga pag-ulan kag pagbaha, kag iban pa nga kalamidad sa rice industry sang pungsod.
Nagagamit ini sang data-driven tool nga nagatumod sa kalaparon sang mga talamnan sang palay, pag-project sang produksiyon, kag pag-monitor sang epekto sang natural calamities kasubong sang El Nino.
Gintukod ini agud matugunan ang mga hamon nga giunapangatubang sang mga Pilipino nga mangunguma humalin pa sang 2013, dala sang sobra nga pagbag-o sang klima ukon climate change.
Suno kay DA Director Glenn Dela Cruz Estrada, ang gingawad nga pagkilala ang nagapakita sa importansya sang kolaborasyon, teknolohiya, kag innovation sa pagpaayo sang sektor sang pangunguma, butang nga ginapamatud-an sang mga siyentistang Pinoy nga nagtukod sa PRiSM.
Dugang pa sini, ang sistema nga nakapaloob sa PRiSM ang gikan sa gintingub nga effort sang DA, Philippine Rice Research Institute, kag International Rice Research Institute (IRRI). Suno pa kay Estrada, sumugod sang ginagamit ang ini nga teknolohiya, nahimo na sang pungsod nga matumod ang akma nga solusyon ukon sabat sa mga naeksperyensyahan nga kalamidad sa pungsod sa mas madasig kag mas madali nga panahon, rason agud mabuligan ang mga mangunguma nga gilayon nga makabangon.
