Isa pa ka Filipino seafarer ang ginaalegar nga missing matapos ginpadala ang isa ka tugboat agud magbulig sa isa ka barko sa Strait of Hormuz sa Middle East sandig sa nabaton nga report sang Department of Migrant Workers.
Suno kay DMW Sec. Hans Leo Cacdac, nagapakig-angot na ang ahensya sa pamilya sang seafarer agud mahatagan sila sang bulig.
Sang nagligad semana, gindeklara sang DMW ang Persian Gulf kag ang Strait of Hormuz bilang “War Risk Operations Area” sa tunga sang nagalala nga tension sa Middle East bangud sa joint strikes sang US kag Israel batuk sa Iran.
Nahibaluan nga may yara sang una nga Pinoy seafarer nga ginaalegar missing matapos maigo sang missile ang tugboat nga iya ginasakyan samtang naga-operate sa Strait of Hormuz.
Suno sa pamilya sang 46 anyos nga seafarer halin sa Capalonga, Camarines Norte, ginpahibalo sa ila sang logistics company nga iya ginatrabahuan ang insidente matapos ang missile attack sa tugboat sa Mussafah 2 sang Marso 6.
Ginpahayag sang pamilya nga nakapadala pa ang seafarer sang video message sa ila samtang yara sa barko agud buligan ang isa ka container ship nga na-stranded.
Sa subong, nagapanawagan ang pamilya sang dugang nga impormasyon may kaangtanan sa insidente kag kahimtangan sang nadula nga crew member.
