ROXAS CITY, CAPIZ – Ginalauman sang grupo nga Pagkakaisa ng mga Samahan ng Tsuper at Operator Nationwide – Capiz nga mahatagan sang pagtamod sa State of the Nation Address (SONA) ni President Ferdinand Marcos Jr ang mga isyu sa transport sector, ilabi na ang Public Transport Modernization Program.
Sa interview sang Bombo Radyo Roxas kay Mr. Joebert Carandang, Chairman sang PISTON-Capiz, iya ginpahayag nga nagapanawagan sila nga ibasura ang modernization program sang gobyerno bangud palpak ini kag labi nga nagpalubong sa utang sang madamo nga driver kag operator.
Suno kay Carandang, ginahinyo man sang ila nga grupo nga mabalik ang prangkisa sang mga operator sa lima ka tuig kag tugutan nga makabiyahe sang hilway para sa pangbuhianan sang ila nga pamilya.
Magluwas sa isyu sa transportasyon, ginasuportahan man sang PISTON ang mga panawagan sang grupo nga Bayan Muna batuk sa korapsyon, pagtaas sang presyo sang balaklon, mga pag-abuso sa tawhanon nga kinamatarong, kag ang isyu sa flood control projects.
Samtang, ang mga miyembro sang PISTON sa National Capital Region ang ginalauman nga magaupod sa hublag-protesta, kaupod ang iban pa nga sektor kadungan sang SONA ni PBBM.
– Interviewed by: Bombo Roadnie Daban Dalanon
