ROXAS CITY – Nagpatigayon sang sinapol ang Committee on Appropriations sang Sangguniang Panlalawigan natuhoy sa proposal sang gobernador sa plano nga pagpatukod sang Capiz Convention Center.
Gintalakay sa committee hearing ang request ni Governor Esteban Evan Contreras II nga aprubahan ang deed of donation sang Pamilya Ong sa provincial government.
Nagtambong man sa sinapol si Mr. Bob Ong kag mga private sectors sa amo nga hearing.
Mahibaluan nga sa ginpatigayon nga sinapol, ginkwestyon ni Board Member Jonathan Sonny Besa kun sa diin magahalin ang pondo nga gamiton.
Luyad man sini mahibaluan kun masarangan sang probinsya ang pagpatukod sang Capiz Convention Center nga may yara sang 5,000-sitting capacity nga mas daku kun ikomparar sa Iloilo Convention Center.
Gin-athag man ni Besa kag sang provincial board nga wala sila nagapamalabag sa luyag sang gobernador.
Nakakita man sang solusyon ang provincial board pinaagi sa pag-apply sa Department of Tourism (DOT) sang pondo sa pagpatukod sang Capiz Convention Center kag ang suhestyon nga may yara sang Usufruct Agreement natuhoy sa gindonar nga duta sang pamilya Ong.
Sa pihak nga nagpasalig na sa publiko ang Contreras Administration nga may pila ka mga opisyal kag senador ang magahatag sang donasyon bilang bulig sa plano sang gobernador, nagapati si Besa nga wala pa ini maklaruhan.
Nahibaluan nga luyag lamang sang provincial board nga may yara sang bastante nga pondo nga gamiton para sa nasambit nga edipisyo.
Nagpanugyan man si Besa sa gobernador nga indi lamang magsaku bangud luyag man sang provincial board nga may yara sang nagakaigo nga pondo para sa amo nga proyekto.
