Istrikto nga ipatuman sang Philippine National Police (PNP) ang “one-strike policy” batuk sa mga police commander nga wala makapugong ukon gilayon nga makasolbar sang mga insidente sang indiscriminate firing sa tion sang pagsaulog sang paskwa kag bag-ong tuig.
Suno kay PNP spokesperson Brig. Gen. Randulf Tuaño, PNP Chief Melencio Nartatez Jr., nagpagwa sang memorandum circular para sa implementasyon ang nasambit nga polisa.
Gin-athag sang police official nga kun may ma-record nga insidente sang indiscriminate firing, ginahatagan sang 36 oras ang police commander agud resolbahon ini, kay kon indi, iga-relieve ang mga ini sa ila pwesto.
Agud malikawan ang kaangay nga insidente, ginakonsiderar sang national police ang pagselyuhan sang mga armas luthang sang mga pulis.
Samtang, suno sa PNP, maga-deploy ini sang 100,000 ka mga kapulisan sa bug-os nga pungsod agud magbantay sa mga gutok nga lugar sa tion sang holiday season.
Igapahamtang naman sa heightened alert status ang PNP umpisa Martes, Disyembre 16 kag mangin full alert sa pagsaulog sang Paskwa kag Bag-ong Tuig.
Suno sa isa ka opisyal sang PNP, ang mataas nga visibility sang kapulisan sang nagligad nga mga tinuig nagresulta sa pagnubo sang narecord nga mga krimen.
