Naghiwat si Pope Leo XIV sang iya una nga misa bilang bag-o nga lider sang Simbahan Katoliko matapos nga naghimo sang maragtas bilang una nga American-born pontiff.
Ginpangunahan sang Santo Papa ang isa ka pribado nga misa kaupod ang mga cardinal sa Sistine Chapel mga alas-11:00 sang aga, oras sang Roma ukon alas-5:00 sang hapon, oras sa Pilipinas kahapon nga adlaw, Biernes, Mayo 9, sa diin ang lider sang Simbahan Katoliko ang naghatag sang iya una nga homiliya bilang Santo Papa sa Ingles kag Italyano.
Gin-umpisahan sang Santo Papa ang iya homiliya sa Ingles sa diin ginpasalamatan sini ang mga Cardinal electors sa ila pagsalig sa iya.
Naghatag man sang tinagipusuon nga pahanumdom si Papa Leo XIV sa mga kardinal nga gintawag sila sa pagpamatuod sang ila masinadyahon nga pagtuo kay Kristo nga Manluluwas.
Nagpanawagan man ang bag-o nga Santo Papa nga padalumon pirme ang personal nga kaangtanan kay Kristo kag ginhatagan pagtamod nga kon wala sang pagtuo, wala sang pulos ang kabuhi.
Ang homiliya sang bag-o nga lider sang Simbahan Katoliko, nga iya ginbasa sa Italyano, nagsentro sa una nga Santo Papa sang Simbahan Katoliko nga si San Pedro kag ginpanumdom ang iya mga pulong nga sarang mabasa sa ebanghelyo suno kay San Mateo.
Gindumdom man ni Pope Leo XIV nga gintawag siya sang Diyos pinaagi sa iya pagpili bilang ika-267 nga Santo Papa.
Gintapos sang Santo Papa ang iya homiliya paagi sa pangamuyo.
