ROXAS CITY, CAPIZ- Ginkumpirmar sang Civil Aviation Authority of the Philippines (CAAP) nga wala sang may napilasan matapos nga nagdaba-daba kag naglupok ang isa ka power bank sa Initial Security Screening Checkpoint sang Roxas Airport.
Sa interview sang Bombo Radyo kay Police Lieutenant Jose Dexter Paulin, Officer-in-Charge sang Roxas Airport Police Station, ginpahayag sini nga nadiskubre sang airport personnel ang isa ka 72,000 milliampere-hour nga power bank sa bagahe sang isa ka babaye nga pasahero padulong sa Manila.
Dugang pa sini, ang nasambit nga power bank naglapaw sa gintalana nga 160 watt-hour limit nga ginatugutan nga isakay sa eroplano.
Hugot naman nga ginsiling sang pasahero nga gintugutan ang nasambit nga power bank nga dal-on sa byahe, apang nagpasugo ini nga ibalik sa kaupod sini sa guha sang paluparan.
Samtang gina-asikaso ang pag-turn over, hinali nalang nga nag-igrab ang power bank sa ibabaw sang inspection table.
Gilayon naman nga nagresponde ang isa ka airport security guard kag nag-gamit sang fire extinguisher agud palungon ang kalayo.
Sa pihak sang pagpalong sang kalayo, naglupok man sa gihapon ang power bank makaligad ang pila ka minuto.
Maswerte naman nga wala sang may napilasan nga indibidwal kag wala man sang may naguba nga mga pagkabutang.
Ginpasalamatan sang CAAP ang madasig nga aksyon sang airport security kag Office for Transportation Security personnel, kag ginsiling nga ang insidente nagapakita sang importansya sang hugot nga pagtuman sa mga patakaran sang aviation safety, labi na sa pagdala sang mga lithium-ion powered devices kasubong sang power bank.
