ROXAS CITY – Tuman na lamang ang pagpasalamat sang Philippine Red Cross- Capiz Chapter matapos nangin madinalag-on ang mga programa sang talatapan sa pihak sang ginapangatubang nga pandemya sang nagligad nga tuig 2020.
Ini ang ginpahayag ni Mr. Ketch Armiza, Donor Recruitment Officer sang PRC-Capiz sang mainterview sang Bombo Radyo.
Suno kay Armiza nga naglab-ot sa 10,346 ka mga blood units ukon 1.28 porsyento sang populasyon ang narekord sang talatapan sa probinsya sa bulig sang Local kag Non Local Government Units.
Ginpahayag ni Armiza nga nagapanguna ang banwa sang Maayon sa 16 ka mga kabanwahana sa probinsya kag siyudad sang Roxas nga may pinakamadamo nga blood donors kun sa diin naglab-ot sa (3.64%).
Ang Top 10 barangays naman sa probinsya nga may pinakamadamo nga nalikom sang dugo kag blood donors amo ang Barangay Culilang Pres. Roxas.; Paralian, Maayon; Alipasiwan, Dumarao; Duluan, Maayon; Sta. Carmen kag Sta. Rosario, Dumalag; Jambad, Dumarao; Quevedo, Maayon; Guba, Pontevedra; kag Alasaging, Maayon, Capiz.
Ginpasalamatan naman ni Armiza ang mga ahensya kag pribado nga mga sektor nga padayon nagasuporta sa ila nga programa kag aktibidad.
Kalakip na diri ang Bombo Radyo Roxas bangud sa Dugong Bombo nga tuigan na ginapatigayon.
Ginalaoman naman sang talatapan nga mas ‘Challenging’ pa subong nga tuig 2021 sa bahin sang PRC apang nakasigurado ini nga preparado sila.
Magluwas diri, madamo naman sang mga programa kag aktibidad ang PRC-Capiz subong nga tuig 2021.
