Plano nga magpagwa sang Executive Order si President Ferdinand Marcos Jr. nga mabutang sa P50 limit ang presyo sang imported milled rice.
Ginrekomenda sang Department of Agriculture (DA) ang pagpatuman sang P50 nga price cap sa imported nga bugas bangud namonitor sang ahensya ang “unreasonable” nga pagsaka sang presyo, nga gina-angot nga rason sa ginapahayag pagpamintaha sa global oil shock tuga sang tensyon sa Middle East.
Suno kay Agriculture Secretary Francisco Tiu Laurel Jr., may mga retailers nga na-monitor nga nagabaligya sang imported nga bugas sa P55 tubtob P58 kada kilo.
Isa sa mga inisyal nga tikang sang DA agud mapunggan ang pagsaka sang presyo amo ang paghatag sang bugas nga nagabalor P45 tubtob P48 kada kilo sa pila ka mga merkado.
Samtang, ginpahayag man ni Marcos nga ginapalapad ang programa nga P20 kada kilo nga bugas sa tunga sang nagapadayon nga tensyon sa Middle East, kag may yara sang 627 centers nga nagabaligya sang mas barato nga bugas.
Ginsiguro man ni Marcos nga sa subong, ang presyo sang bugas ang nagapabilin pa sa ginrekomenda nga retail price level.
