Personal nga gin-inspeksyon ni President Ferdinand “Bongbong” Marcos Jr. subong nga Biyernes ang pag-impake sang mga food pack sa National Resource Operations Center (NROC) sang Department of Social Welfare and Development (DSWD) sa syudad sang Pasay.
Ang mga relief goods kabahin sang gilayon nga bulig nga ipanagtag sa mga residente sang Northern Luzon nga apektado sang Tropical Storm Crising.
Suno sa Presidente, importante nga bastante kag maayo ang unod sang kada food pack agud sabton ang kinahanglanon sang mga pumuluyo sa tunga sang kalamidad.
Samtang, sa 11:00 a.m. weather bulletin sang PAGASA, ginbatak ang Tropical Cyclone Wind Signal (TCWS) No. 2 sa pulo ka lugar sa Luzon, kalakip ang Batanes, Cagayan (kaupod ang Babuyan Islands), kag iban pa nga bahin sang rehiyon samtang nagapalapit ang bagyo Crising sa Cagayan kag Babuyan Islands. Medyo nagbaskog ang bagyo kag ginalauman nga magabaskog pa ini bilang isa ka severe tropical storm pag-abot buwas nga adlaw sang Sabado.
Ginbataak man ang Tropical Cyclone Wind Signal No. 1 sa mga kalapit nga probinsya kasubong sang Quirino, Nueva Vizcaya, La Union, kag naaminhan nga bahin sang Pangasinan, samtang padayon ang pag-ulan kag pagmadlos sang hangin sa mga nasambit nga lugar.
Ginpahanumduman sang PAGASA ang publiko nga maghanda kag mabantay sa mga opisyal nga abiso agud mapabilin ang kaluwasan sang tanan.
