ROXAS CITY – Ginsabat ni Brgy. Dumulog Senior Citizen President Mr. Reynaldo Martinez ang mga alegasyon sang pila ka senior citizen batuk sa iya.
Sa interview sang Bombo Radyo kay Mr. Martinez, ginpanginwala sini ang alegasyon nga nagapanukot ini sang P500 agud malakip ang isa ka senior citizen sa listahan sang mga pensioner.
Pahayag pa sini nga wala sang kamatuoran ang mga alegasyon nga ginahaboy sa iya kag pagpanamad lang ini sa iya imahe bangud luyag ini nga pahalinon sa pagka-presidente sang senior citizen.
Aminado man ini nga may mga ginkakas ini nga miyembro apang nakabase man suno diri sa guidelines sang DSWD bangud may iban nga miyembro nga survivor sang ila bana kun sa diin may ara na sang SSS pension kag mas dako ang ginabaton kun ikumparar sa social pension.
Sa isyu naman nga duha sila sang iya asawa ang nagabaton sang social pension, gin-athag sini nga siya lamang ang may pension kag nagakuha lamang ang iya asawa kun payout bangud gin-authorized ini sang utod sang iya asawa nga paralisado ukon naka-bedridden.
Ginklaro man sini nga ang P20 nga ginasukot sa mga miyembro kada tuig ang ginagamit sa expenses kaangay sa transportasyon sa pagproseso sa mga IDs kag iban nga requirements sang mga miyembro kag subong man ginabakal sang mga kinahanglanon nga office supply kag ginabalik man kun may sobra sa kwarta.
Gintuad man sini nga duha ang asosasyon sang senior citizen sa Brgy. Dumulog kag sila ang lehitimo nga gina-recognized sang FSCAP.
Ginpahayag pa sini nga ang amo nga mga bagay nasabat na sang Setyembre 3, 2024 sang nagpatawag sang assembly meeting kag ginpatpat ang mga guidelines apang wala pa suno diri natapos paathag ang mga opisyal sang senior citizen nag-walk out na ang iban.
