Posible nga magsaka ang presyo sang karne sang baboy sa Teodoro Arcenas Trade Center bangud sang padayon nga pagsaka ang presyo sang gatong.
Sa interview sang Bombo Radyo kay Punong Barangay Roberto Ross Roldan, President sang Liga ng mga Barangay Roxas City iya ginpahayag nga kun padayon ang pagtaas sang presyo sang gatong, nagataas man ang operational cost sang pila ka mga supplier gikan sa Bacolod kag Cebu.
Suno kay Roldan, ang live weight sang baboy ang nagsaka man halin P195 per kilo sa P205 per kilo.
Pahayag pa niya, magluwas sa pagtaas sang operation cost, lakip man sa ginakonsidera sang possible pagtaas sang presyo sang baboy amo ang ila ginabayaran sa pwesto, slaughter fee, arcabala, kag bayad sa ila mga tinawo.
Nagapanawagan man ang natungdan sa publiko sang paghangop sa sitwasyon kag ginpasiguro man ang mayo nga kalidad sang karne sang baboy para sa kaluwasan sang mga manugbakal.
