ROXAS CITY, CAPIZ- Ginapapreparar sang Capiz Provincial Disaster Risk Reduction and Management Office (PDRRMO) sa epekto sang mabaskog nga ulan nga magabubo sa probinsya sang Capiz bwas nga adlaw nga dala sang Tropical Depression Verbena.
Sa interview sang Bombo Radyo kay Atty. Shiela Artillero, Head sang Capiz Provincial Disaster Risk Reduction and Management Office (PDRRMO), iya ginpahayag nga sandig sa forecast sang Philippine Atmospheric, Geophysical and Astronomical Services Administration (PAGASA), may posibilidad nga maga-bubo ang 100-200 millimetre nga volume sang ulan sa probinsya.
Suno kay Atty. Artillero, naka-standby na ang mga rescue personnel agud madasig nga makahatag sang bulig sa mga nagakinahanglan.
Natalana naman bwas nga adlaw nga ipasaka sa red alert status ang bug-os nga probinsya sang Capiz.
Pahayag niya, may mga naka-prepositioned naman nga mga evacuation centers ang tagsa ka mga kabanwahan.
Ginapanugyan man sang natungdan nga magpatigayon gilayon sang preemptive evacuation kun ginakinahanglan na.
Nagpanawagan man ang natungdan sa publiko nga sa gihapon mag-kooperar sa ginapatuman sang mga natungdan kag indi na magpakatig-a pa kun ginapa-evacuate na agud malikawan ang kun ano man nga sahi sang insidente ang posible nga magluntad sa tion sang malain nga tyempo.
Interviewed by Bombo Francis Biñas
