ROXAS CITY, CAPIZ- Naglab-ot sa 40 ka mga panimalay ang ginguba sang Bagyo Opong sa Western Visayas.
Sa interview sang Bombo Radyo kay Maria Christina Mayor, Head sang 24/7 Operations Unit kag Information Officer sang Office of the Civil Defense 6, iya ginpahayag nga 32 tanan ka mga puluy-an ang partially damaged sa diin walo (8) ang sa Aklan, 16 sa Antique kag syam (9) sa Iloilo. Yara naman sa walo (8) ang totally damaged sa diin isa (1) sa Aklan, isa (1) sa Capiz kag anom (6) sa Iloilo.
Magluwas sa guba nga mga puluy-an, nagdangat man sa 74, 416 ka mga pamilya ukon katumbas sang 270,558 ka mga indibidwal ang numero sang mga nag-evacuate. Yara sa 11, 123 ka pamilya ukon 42, 017 ka mga indibidwal ang nagikan sa Aklan, 25,880 ka pamilya ukon 85,519 ka mga indibidwal nagikan sa Antique, 6,969 ka pamilya ukon 22,993 ka mga indibidwal, 6,328 ka pamilya ukon 28, 842 ka mga indibidwal sa Guimaras kag yara naman sa 24,116 ka pamilya ukon 87,187 ka mga indibidwal nagikan sa Iloilo.
Suno kay Mayor, madamo man sang mga sektor ang naapektuhan kaangay sang sa Agrikultura sa diin 237 ka mga mangunguma kag manugpangisda ang apektado kag ginbilinan sang halit nga nagabalor P1,721,087.89
Dugang pa nya, naglab-ot man sa lima (5) ka mga imprastruktura ang naguba sa diin duwa (2) ang halin sa Iloilo kag tatlo (3) ang halin sa Antique nga ginabulubanta nagabalor sang P43,775,920.58 kabug-usan.
Pahayag pa sang natungdan, ang datos nga hawid nila sa subong ang partial palang kag padayon pa sila sa pagkolekta.
Samtang, sa pihak sang halit nga ginbilin sang bagyo, nagapasalamat si Mayor sa tanan nga mga pumuluyo kag natungdan nga ahensya bangud nga wala sang may narekord nga kaswalidad sa rehiyon.
Interviewed by Bombo Roadnie Daban Dalanon
