CAPIZ – Gin-akusaran sang Punong Barangay sang Intungcan, Pontevedra, Capiz ang Department of Public Works and Highways-Capiz 1st District Engineering Office nga nagapabungol-bungol kag nagapabulag-bulag lang sa ila nga reklamo nahanungod sa palpak nga taytay sa ila lugar nga nangin kabangdanan sang pagbaha apisar sa gamay lang nga pag-ulan.
Sa interview sang Bombo Radyo kay Punong Barangay Jorge Casipit, iya ginpahayag nga makapila na ka beses nga ginreklamo nila ang amo nga taytay nga sa pagkamatuod nakapadala naman siya sang position paper nga nagahingyo sa ahensya nga liwaton ang desinyo sini agud may yara sang bastante nga ligwa nga ginaagyan ang tubig kag indi magpondo kag magtaas nga nagaapekto sa iya mga pumuluyo.
Suno kay Casipit, madugay na nga agunto sang mga residente humalin sang nahuman ang taytay apang wala gid sang tikang gikan sa Department of Public Works and Highways -Capiz 1st District Engineering Office.
Masobra 60 ka mga balay ang masami ginabaha sa tion nga magbubo ang ulan — mahinay man ukon mamunog.
Masakit lang nga kamatuoran pahayag niya nga kun may yara na gani sang may mapatay bangud sa baha, dira na kag magparik-parik kag maghulag ang mga ahensya sang gobyerno.
Nagpanawagan man Punong Barangay kay Presidente Ferdinand Marcos Jr. kag kay Department of Public Works and Highways Sec. Vince Dizon nga hatagan sang igtalupangod ang ila ginalapalab-ot nga problema bangud ginaalegar, wala sila ginapamatian sang Capiz-1st District Engineering Office.
