Ginkumpirma sang Qatar Ministry of Defense nga naka-eksperyensya sila sang missile attack, samtang aktibo ini nga gin-intercept sang ila air defense systems.
Bangud sini, nagpanawagan ang gobyerno sa ila mga pumuluyo, residente kag mga dumuluong nga magpabilin nga kalmado, magsunod sa opisyal nga mga instruksyon, likawan ang pagpalapta sang indi matuod nga balita, kag magsalig lamang sa mga impormasyon gikan sa mga opisyal sang gobyerno.
Madumduman nga una na nga ginpahayag sang Qatar sang Martes nga indi lang ang military facilities ang ginpuntirya sang Iran kundi mangin na ang bug-os nga teritoryo sang Qatar, lakip na ang Hamad International Airport kag gas facilities sa pungsod.
Gindugang sini nga preparado ang pungsod kag himuon ang tanan nga tikang agud depensahan ang pungsod.
Ginsambit man sang opisyal nga ang nagapanguna nga prayoridad sang gobyerno subong amo ang kaluwasan sang mga pumuluyo kag residente sa pungsod, nga ginakabug-usan sang ginabanta 140 ka nasyonalidad.
Ginhatagan man niya pagtamod nga handa ang pungsod sa pagbalos kag may yara sang bastante nga air-defense missiles agud atubangon ang ano man nga pag-atake.
Samtang, nagapabilin nga sirado ang airspace sang Qatar kag masobra naman sa 8,000 ka mga pasahero sa transit ang na-stranded.
