ROXAS CITY – Luyag ni City Councilor Dr. Cesar Yap Jr., nga mapabilin nga hilway sa rabies ang isla sang Olotayan sining syudad.
Sa privileged speech nga gindul-ong sang chairman sang Committee on Health sa sesyon sang Sangguniang Panlungsod kahapon, ginpahayag sini nga indi na madeklarar nga rabies-free ang bilog nga syudad bangud sandig sa iya pagpakig-angot kay City Veterenarian Dr. Roberto Dante Corros, may pumuluyo na sa syudad nga napatay sang damlag lang bangud sa rabies.
Apang suno sa konsehal, nagapabilin pa nga rabies-free ang Barangay Olotayan kag kinahanglan nga mapabilin ang ini nga estado sang isla.
Bangud sini, tuyo ni Yap nga magpasar sang ordinansa nga nagamando nga ipaidalum sa quarantine ang tanan nga mga kasapatan (four-legged animals) nga ginadala sa isla.
Katuyuan man sini nga ordinansa nga magpahamtang sang quarantine office sa pantalan sang isla agud magtsekyar sa mga kasapatan nga nagaabot diri kag masiguro nga indi maglapta ang rabies sa Olotayan.
Natalana naman nga magpatawag sang committee hearing ang konsehal agud matalakay ini nga hagna.
