ROXAS CITY – Padayon nga pagsalig kag pagsuporta sang Jamindananon ang nagdala sa kadalag-an ni Mayor Mac Arthur Valdemar matapos nga ini liwat ang nagpangibabaw sa naguwa nga resulta sang eleksyon sadtong Mayo 9, 2022.
Sa interview sang Bombo Radyo kay Mayor-elect Valdemar, ginpahayag sini nga nagabuligay gid ang ila grupo sa pagpangampanya kag nakita niya diri nga may yara sang tagsa ka abilidad ang kada miyembro sang iya nga partido.
Malipayon man ini bangud nakasulod gid ang tanan nga miyembro sini gani nagalaom siya nga mangin mahapos kag mahimo gid nila nga makaserbisyo sang tampad sa mga pumuluyo sang nasambit nga banwa.
Mahibaluan nga ini na ang ikatatlo kag ulihi nga termino ni Valdemar sa pagka-mayor.
Ginsiguro man sini nga padayunon niya ang iya mga naumpisahan kag lauman ang mga bag-o nga proyekto nga iya igatukod para sa kauswagan kag makabulig sa pagpasanyog sang ekonomiya sa ila nga banwa.
Nagapasalamat gid ini sa mga pumuluyo nga padayon nga nagasalig sa iya kag sa iya partido agud maangkon ang landslide victory.
Ginpahayag pa sang alkalde nga iya gid pagatipigan ang pagsalig nga ginhatag sa iya sang mga pumuluyo kag ibalik niya ini pinaagi sa maayo nga pagserbisyo.
Dugang pa sini nga excited gid siya sa iya ulihi nga termino bangud tumalagsahon lang nga mangin isa na ang provincial government kag ila munisipalidad bangud kapartido niya ang nagdaog nga bag-o nga gobernador kag dako gid sini ang mabulig para sa ila nga kauswagan.
