PANITAN, CAPIZ – Liwat na nga ginsuguran ang pagkaayo sang napostpone nga river control project sa Barangay Ambilay, Panitan, Capiz.
Sa interview sang Bombo Radyo kay Punong Barangay Juan Deita Baulite, iya ginpahayag nga may yara na sang mga katapo sang Department of Public Works and Highways (DPWH) kaupod ang contractor sini nga Jasa Builders Construction sa lugar nga nagapatigayon sang pagkaayo.
Suno kay Baulite, nagpangayo sang tatlo ka bulan nga extension ang ahensya agud nga matigayon nga matapos ang nasambit nga proyekto.
Nahibaluan nga nagpahamtang man sang katapo sang barangay council agud nga magbantay sa lugar.
Nahibaluan nga sang damlag lang, nagbisita ang Ombudsman regional office sa lugar agud i-tsekyar ang nasambit nga proyekto nga gindeklara nga 71% accomplished na apang ang kamatuoran, wala ma makalab-ot sa 10% ang accomplished part sang 123 meters nga river control project.
Nagpanawagan man ang natungdan nga matigayon na nga matapos ang amo nga proyekto agud nga makuha na ang pagkabalaka sang mga pumuluyo sa tion sang pagbaha.
