ROXAS CITY – Ginganyat ni City Councilor Cesar Yap Jr., ang mga pumuluyo sang syudad nga pabakunahan ang ila hinuptan nga mga ido agud makalikaw sa halit nga dala sang balatian nga rabies.
Sa iya gindul-ong nga diskurso pribiliheyo sa sesyon sang Roxas City Council, ginkasubo sang konsehal ang madamo nga kaso sang rabies sa syudad kun sa diin nagakagastuhan ang gobyerno sa mga rabies vaccines kag sa ayuda nga ginahatag sa mga pasyente bangud mahimo man kuntani ini malikawan.
Ini suno kay Yap ang pinaagi sa temprano nga pagpabakuna sang mga hinuptan nga ido nga libre man nga ginapatigayon sang Office of the City Veterenarian.
Pinaagi man sini suno kay Yap, indi lamang pondo sang gobyerno ang masalbar kundi mangin ang kabuhi man sang tawo nga malikaw sa balatian nga rabies.
