Ginpabaskog sang Roxas City Government ang koordinasyon sang nagkalain-lain nga ahensya agud masiguro ang proteksyon, kahimsog kag kaayuhan sang mga kabataan, ilabi na sa tion sang krisis.
Ini ang kabahin sang ginpatigayon nga Inter-Agency Consultation on Child-Centered Crisis Response nga nagtinguha nga mapabaskog ang pagbinuligay sang mga ahensya sa pag-atubang sang mga sitwasyon nga mahimo makaapekto sa seguridad kag kaayuhan sang mga kabataan.
Sa interview sang Bombo Radyo kay Roxas City Councilor Victor Federico Acepcion, iya ginpahayag ang importansya sang husto nga koordinasyon sa pagpatuman sang nagakaigo nga mga tikang para sa pag-atipan kag pagprotekta sa mga kabataan.
Lakip sa mga ginatalakay ang mga protocol may kaangtanan sa psychosocial support ukon suporta sa mental kag emosyonal nga kahimtangan, kag child protection ukon pagproteher sa mga kabataan batok sa nagkalain-lain nga peligro.
Pinaagi sa sini nga inisyatibo, ginatinguhaan sang lokal nga pangulohan nga mangin mas preparado kag epektibo ang mga ahensya sa paghatag sang nagakaigo nga bulig kag proteksyon sa mga kabataan sa tion sang emerhensya ukon krisis.
