ROXAS CITY — Dismayado ang isa ka lalaki nga nagpadulong sa Roxas City Police Station para kuntani magpa-blotter sa iya nadula nga cellphone sang kaaganhon sang Hunyo 19 matapos na-experiensiyahan ang ginasiling ‘hugot’ nga seguridad sa amo nga istasyon.
Suno kay alyas John ginkakibot sini nga sa iya pag-abot sa Roxas City Police Station, sarado kag indi mabuksan ang glass door bangud nakakandado kag may natangkas pa nga monobloc chairs sa likod sang pwertahan.
Nagpanawag kag nagpanuktok pa si alyas John kag naghinulat sang kapin 30 minutos apang wala sa gihapon sang may nagbukas sa iya.
Bangud sini, ginpakamaayo na lamang niya nga magpauli nga wala makapa-blotter sang iya concern.
Nagreklamo si alyas John bangud nagapati siya nga indi ini ang husto nga pamaagi sa pagpatuman sang seguridad sang pulisya sa ila nga istasyon.
Nahibaluan man sa pagpangusisa sang Bombo Radyo nga makapila ka beses na nga natabo sa amo nga istasyon nga nakakandado ang pwertahan nga wala sang may makasulod kag wala man sang makit-an nga desk officer sa sulod.
Base pa sa impormasyon nga nakuha sang Bombo Radyo, may mga pulis man mismo nga nakaagi nga naghinulat sang madugay sa guha kag wala nga daan makasulod sa istasyon bangud ini ang sarado.
