ROXAS CITY – Nagbiyahe na sa Estancia port ang MB Triple M matapos ang pito ka oras nga pagpanilong sa Isla Saparos Dako, Masbate para makalikaw sa malain nga lakat sang panahon.
Suno kay Lt. Commander Edison Diaz, station commander sang PCG-Roxas, nagdesisyon ang kapitan sang sakayan pandagat nga magtenir sa nasambit nga lugar matapos nakita nga tuman ka baskog sang hangin kag dalagkuan ang balud sa kadagatan kag indi sini luyag nga mabutang sa peligro ang kabuhi sang iya mga pasahero.
Nahibaluan nga may sakay nga 40 ka mga tawo ang nasambit nga sakayan pandagat kalakip ang 34 ka mga pasahero, kaupod ang mga bata kag anim nga crew.
Samtang ginpasalamatan naman sang mga pasahero ang mga residente sa lugar, bangud ginhatagan sila sang pagkaon sa temporaryo nga pagtenir sa Isla bangud sa malain nga lakat sang panahon.
