SAPIAN, CAPIZ- Ginpatpat sang Deputy Chief sang Sapian Municipal Police Station ang mga accomplishments sang ila nga talatapan sa banwa sang Sapian, Capiz halin Enero 1 tubtob Setyembre 20, 2025.
Sa interview sang Bombo Radyo kay Police Lieutenant Sharon Odoms, Deputy Chief sang Sapian Municipal Police Station, iya ginpakigbahin ang mga accomplishments sang ila nga talatapan sa diin nga nagresulta sa pagpabilin sang palibot nga malinong kag matawhay.
Sa mga nagkalain-lain nga mga aktibidad nga ginpatigayon sang ila nga team, nakarekord sila sang 32 tanan ka mga accomplishments sa sulod sang amo nga panahon.
Ginakalakipan ini sang duha (2) tanan sa paglapas sa Republic Act 10591 ukon Comprehensive Firearms and Ammunition Regulation Act sa diin isa (1) ang pamaagi sa buybust operation kag isa (1) man ang pamaagi sa search warrant operation. May yara man sang duha (2) tanan sa paglapas sa Repblic Act 9165 ukon Comprehensive Dangerous Drugs Act of 2002, sa diin ginakalakipan ini sang isa (1) pamaagi sa buybust operation kag isa (1) pamaagi sa search warrant implementation. Nakadakop man ang ila nga indibidwal sang 12 tanan ka mga Wanted Persons sa diin nga lima (5) ang mga Top Most Wanted Persons, kagpito (7) ang mga Other Wanted Persons. Anom (6) sa Illegal Fishing, isa (1) sa Illegal Logging, pito (7) sa Loose Firearms kag duha (2) sa explosives.
Dugang diri, nakarekord man sila sang 61 tanan ka mga kriminalidad sa diin nga 51 solved na, pito (7) ang cleared, kag tatlo (3) pa ang underinvestigation kag ginadihon naman nga i-file sa korte.
Apang, pahayag ni Odoms, dako nga ginakabalak-an nila sa banwa amo ang kaso sang mga aksidente sa dalanon, sa diin suno sa iya, nagapadayon naman ang ila nga programa kag implementasyon sang Republic Act 4136 ukon ‘Land Transportation and Traffic Code’ agud mapahagan-hagan ang amo nga insidente.
Pag-abot sa sitwasyon sang seguridad sang banwa sang Sapian, yara sa maayos kag ordered nga kahimtangan ang banwa.
Bangud sa bulig kag suporta sang lokal nga gobyerno, mga barangay officials kag mga pumuluyo sang banwa, nagapabilin ang kalinong kag katawhay sa palibot.
Samtang, nagapadayon sa gihapon ang mga nagkalain-lain nga mga programa sang talatapan kaangay sang pagpanagtag sang mga informative pamphlets sa mga pumuluyo, pag-conduct sang symposium, kag baranggay visitation. Isa pagid ka programa ang sa karon nga ila ginapabaskog amo ang programa nga inisyatibo sang Philippine National Police nga 911 National Emergency Call sa diin amo ang pagpangayo sa ila sang bulig pamaagi sa pagpanawag gamit ang telepono ukon cellphone kag sa sulod sang lima ka minuto ila pagarespondehan.
Pahayag pa ni Odoms, pamaagi sa pagbinuligay sang mga otoridad, lokal nga gobyerno kag mga pumuluyo naagaresulta sa paging madinalag-on ang mga programa sang kapulisan.
Lauman naman suno sa iya nga magapadayon ang tanan nga mga aktibidad sang mga katapo sang Sapian Municipal Police Station agud mapabilin ang kalinong kag katawhay sa palibot sang banwa.
Interviewed by Bombo Francis Biñas and Bombo Sunnie Mae Batencila
