Ginkumpirmar sang Ninoy Aquino International Airport (NAIA) nga umpisa kahapon nga adlaw, indi na pagpahanugutan ang airport security personnel nga makatandog sang passport sang mga pasahero sa pagsulod sa airport terminal.
Suno sa NAIA, ang bag-o nga polisiya ang kabahin sang mga tikang agud maproteksyonan ang mga dokumento nga ginapanag-iyahan sang mga pasahero kag malikawan ang pagkontak.
Ang pagbag-o sa polisiya ang kasunod sang mga report nga ginaalegar nagkalaguba ang mga passport kag wala ginpahanugutan nga makasakay sa eroplano.
Gina-imbestigaran na sang Department of Transportation (DOTr) kag Civil Aeronautics Board (CAB) ang mga reklamo, lakip na ang kaso sang isa ka pasahero nga nagsiling nga wala ginpasakay sang Cebu Pacific ang iya amay sa flight padulong sa Bali, Indonesia sang Abril 15 bangud sang gamay nga gisi sa iya passport.
Una na nga ginpahayag ni DOTr Secretary Vince Dizon sang Abril 30, nga gina-review nila ang CCTV footage agud mahibaluan kun may salabton ang nasambit nga airline.
Suno sa NAIA, natabu ang insidente sa check-in counter sang airline sa Terminal 3 kag wala naulamid ang mga security personnel sang airport.
Gindugang pa sang NAIA nga naga-coordinate na sila sa mga airline partners, DOTr, kag sa Bureau of Immigration (BI) agud mapasingki ang mga proseso kag masiguro nga indi na masulit ang kaangay nga insidente.
