Nagdesisyon ang Senado nga ipaiway na anay ang impeachment case batok kay Vice President Sara Duterte.
Ang amo nga tikang nagserbe bilang pagsabat sa executory decision sang Korte Suprema sa pagbasura sa impeachment complaints.
Ini ang nangin resulta sang nangin motion ni Senador Rodante Marcoleta nga ibasura ang impeachment case batok sa amo nga bise presidente.
Nakakuha sang kabug-usan nga boto nga 19 ka Senador ang nagpasugot nga i-archive na ang kaso samtang may yara sang apat nga nagkontra kag isa man ang nag-abstain.
Ang mga nagboto sang yes ang ginkalakipan nanday : Senators-Alan Peter Cayetano, Pia Cayetano,Ronald Dela Rosa, JV Ejercito, Francis Escudero, Jinggoy Estrada, Sherwin Gatchalian, Bong Go, Lito Lapid, Loren Legarda, Rodante Marcoleta, Imee Marcos, Robinhood Padilla, Erwin Tulfo, Raffy Tulfo, Joel Villanueva, Camille Villar, Mark Villar kag Juan Miguel Zubiri.
Sa diin nga nahimo ang amo nga desisyon pamaagi sa pagkumpirmar ni Senate President ‘Chiz’ Escudero.
Sa diin nga nagboto man ini sang ‘yes’ sa pag-archive sang articles of impeachment batok sa bise presidente.
Dugang pa, nagboto man sang ‘yes’ si Senator Imee Marcos sa diin nga gin-esplikar sini nga indi pag-konsentihon ang isa ka spoiled nga bonjing kag ini na suno sa iya pa nga magpadako sang buwaya.
Samtang ang mga nagkontra ang ginakalakipan nanday: Sen. Vicente “Tito” Sotto III sa diin ginduso sini ang motion nga i-dismiss ang pending motion man ni Senador Rodante Marcoleta kag i-table ang amo nga impeachment case.
Senator Paolo Benigno “Bam” Aquino IV sa diin nga ginpanindugan sini ang independence sang Senado kag sole authority nga magpatigayon sang impeachment trial.
Senator Risa Hontiveros sa diin nga nag-esplikar ini nga indi pa naman pinal ang ruling sang Supreme Court nga ‘unconstitutional’ ang impeachment complaint gani suno sa iya, sa binotohay nga natabo, ang Senado ang “nagpatay” sa articles of impeachment.
kag Senator Francis “Kiko” Pangilinan sa diin nga ginsiling man sini nga kun tani ginhulat lang ang pinal nga desisyon sang korte suprema indi kay sila suno sa iya ang nagpatigayon bangud kaangay ini sang wala pag-respeto sa amo nga hukuman.
Samtang nag-abstain naman si Sen. Panfilo Lacson sa kabangdanan nga suno sa iya may yara pa sang pending nga motion for reconsideration nga gin-file ang Kamara paagi sa Officer of the Solicitor General.
Madumduman nga una na nga ginhinyo ni Sen. Marcoleta nga ibasura na lang ang impeachment case batok kay VP Duterte tubtob sa nagpasugot na lang nga ipaiway ini.
Una na nga ginpaathag ni Sen. Alan Peter Cayetano, nga ang pagbutang sa archive sa impeachment case ni VP Duterte ang wala nagakahulugan nga ini ang patay na apang sa kabaylo mahimo ini nga buhayon liwat pananglitan baliskaron sang Korte Suprema ang desisyon sini.
Nagtakop ang amo nga senate session takna las 9:26 sa gab-I sang Agosto 6, 2025 kag maga-resume ini sa Lunes, Agosto 11, takna las 3:00 sa hapon.
