Ginhingyo ni Senate Minority Leader Aquilino Pimentel III si Pang. Ferdinand Marcos Jr nga magtangdo sang mga katapo sang gabinete nga wala sang ambisyon sa pulitika.
Ini agud nga makatutok ang mga opisyales sang gabinete sa ila tagsa ka trabaho kag masabat ang ano man nga problema nga ginapangatubang sang pungsod.
Suno kay Pimentel, kinahanglan sang presidente ang mga tawo nga makatutok para sa kadalag-an sang iya administrasyon. Kinahanglan suno sa iya ang mga episyente kag epektibo nga mga opisyal nga makabulig sa mga Pilipino kag indi lamang magtutok sa ila kaugalingon nga ambisyon sa pulitika.
Ginhatagan pagtamod man sang senador nga mangin mas objective kag scientific ang mga ‘non-political personalities’ sa ila trabaho.
Kahapon nga adlaw, Mayo 22, sunod-sunod nga nagsumiter sang courtesy resignation ang mga katapo sang gabinete ni Pangulong Marcos bilang sabat sa iya nauna nga panawagan.
Sa resignation letter sang mga katapo sang gabinete, ginpahayag nila ang ila pagtahod sa desisyon sang presidente kag ang handum nga may ‘realignment’ sa gobyerno agud malab-ot kag matuman ang ginalauman sang publiko.
Sa karon, ginahulat pa ang mangin desisyon ni Presidente Marcos sa tanan nga katapo sang iya gabinete nga sunod-sunod nga nagsumiter sang ila courtesy resignation.
