ROXASA CITY – Patay kag halos indi na makilala ang isa ka senior citizen matapos gintupok sang kalayo ang iya puluy-an sa Sitio Dawis, Barangay Tawog banwa sang Sigma.
Ginkilala ang biktima kay Remedios Abal, 91-anyos kag residente sa nasambit nga lugar.
Sandig sa inisyal nga imbestigasyon sang Bureau of Fire Protection (BFP) Sigma takna alas 10:00 kagab-i sang nasunog ang puluy-an kag ini gid ang totally burned.
Mahibaluan nga naga-isahanon ang biktima sang natabo ang amo nga sunog bangud nagpadulong sa kalapit balay ang apo sini nga lalaki kaupod ang asawa kag duwa ka mga kabataan agud maglantaw sang TV.
Ginapahayag nga nagasindi sang kandila kag nagapangadi ang biktima kada gab-i antes magkatulog.
Posible suno diri nga natulugan ang biktima kag nalipatan nga patyon ang kandila kag ini ang ginalantaw nga gintunaan sang sunog.
Samtang, partially burned naman ang kalapit balay sini nga ginapanag-iyahan ni Nape Badenas, 37-anyos kag isa sa mga apo sang biktima.
Suno kay Badenas nabugtawan nalang ini nga ginalamon na sang kalayo ang puluy-an sang iya lola kag gintinguhaan pa sini nga isalbar ang nasambit nga biktima, apang sa pagbutong niya sa kamot sini nakita niya nga nasunog na ang iya lola kag bangud sa tuman nga kainit wala na niya na luwas pa.
Nahibaluan nga human sa light materials ang nasambit nga balay kag ginabanta nagalab-ot sa P50,000 ang nangin kahalitan sang sunog. Samtang, P20,000 naman ang kahalitan sa partially burned nga balay ni Badenas.
Sa karon, yara na sa isa ka punerarya sa banwa sang Sigma ang bangkay sang biktima, samtang padayon pa ang imbestigasyon sang BFP-Sigma sa nagluntad nga sunog.
