ROXAS CITY – Patay ang senior citizen matapos ginbuno sang iya hinablos kaina alas 4:50 sang hapon, Mayo 30, 2024 sa Brgy. Esteban, Pilar, Capiz.
Ginkilala ang biktima kay alyas Lando, 66-anyos kag ang ginapahayag nga suspek amo ang iya hinablos nga si alyas Ato, 22-anyos kag lunsay mga residente sang nasambit nga lugar.
Suno kay PMAJ Alfred De Leon, Hepe sang Pilar Municipal Police Station, naga-inom-inom ang suspek sa guwa sang iya puluy-an sang ginpadulungan ini sang biktima kag ginsaway. Bangud sini may nagluntad nga mainit nga argumento sa tunga sang duwa. Ginapahayag nga ginlamposan sang biktima ang suspek sang butong nga nag-igo sa agtang sini.
Bangud sa natabo, nagsulod sa iya balay ang suspek kun sa diin nagkuha ini sang kutsilyo kag ginbalikan ang biktima kag ginbuno. Nag-angkon sang patal nga pilas ang biktima sa iya nawala nga bahin sang tiyan.
Gilayon nga gindala sang responding team sang amo nga banwa ang biktima sa RHU Pilar apang gindeklarar nga dead on arrival sang doktor nga nag-atendir.
Narekober naman sang mga otoridad sa lugar sang ginluntaran sang insidente ang kutsilyo nga gingamit sang suspek sa pagpangbuno.
Naaresto sang mga kapulisan ang suspek kag sa karon yara na ini sa kustodiya sang Pilar PNP para sa nagakaigo nga disposisyon.
