ROXAS CITY – Kumpleto ang tanan nga mga Sangguniang Bayan Members sa ginpatigayon pinakaulihi nga regular session sadtong Oktubre 12 sa banwa sang Sapian, Capiz.
Ini ang ginpahayag ni SB Member Ferdinand Baguio sang mainterview sang Bombo Radyo.
Suno kay Baguio nga nangin maayo ang ginpatigayon nga session sang Sanggunian Bayan.
Magluwas diri, kumpleto man sila tanan sa ginpatigayon nga session sadtong Setyembre 14 kun sa diin gintalakay nila ang Bayanihan Grant nga nagalab-ot sa P8,671,626 kag Supplemental Budget nga P30,000,000 para sa mga kinahanglanon sang ila banwa.
Ginpahayag naman ni Baguio nga samtang nagapatigayon sang session kaupod ang presiding officer nga si Vice Mayor Ralph Ordunia may pila ka mga SB Member nga nagaduso nga himuon nga null and void ang tinalikdan nga mga session sang Team BOCOG sadtong Setyembre 21 kag 28.
Apang, ginpanindugan ni Baguio nga nagasandig lamang sila sa mga ginapatuman nga provision ukon Internal Rules of Procedures ukon IRP sa tagsa ka magpatigayon sila sang session.
Bangud diri, nagpaathag ang Team BOCOG nga ginalakipan nanday SB Members Baguio, Orelio, Cordero, Obordo kag Gallardo nga wala sang kinamatarong nga ideklarar nga null and void ang amo nga sessions bangud mahimo lamang nga mag resolbar sini amo ang DILG ukon ang mga nagakaigo nga ahensya sang gobyerno.
Mahibaluan nga nagtuga ini sang pila ka mga argumento sa tunga sang pila ka mga SB Members kag Ordunia kun sa diin suno kay Baguio wala man ginasapak ang iya pag-alsa sang kamot agud kuntani mag-object.
Samtang, nagapati naman ang Team Bocog nga valid ang ginpatigayon nila nga session bangud nagsandig lamang si IRP provisions kag wala man sang court order nga ginpapanaog sa ila.
