SIGMA, CAPIZ- Gin-athag sang alkalde sang banwa sang Sigma sa probinsya sang Capiz ang may kaangtanan sa ginpalab-ot nga reklamo sang duha ka mga tagreklamo sa talatapan sang Sangguniang Panlalawigan natuhoy sa ginapatuman nga ‘Speed Limit Ordinance’ sa amo nga banwa.
Sa interview sang Bombo Radyo kay Sigma Municipal Mayor Dante Eslabon, iya ginpahayag nga nahibaluan na nila ang reklamo apang wala ini gin-agi sa ila nga talatapan.
Dugang pa sini nga ang duha ka mga tagreklamo ang wala man nagpakilala sang ila nga mga identidad.
Samtang, kasunod sang pagpalab-ot sang reklamo, nagpatigayon sang committee hearing ang nagkalatungdan nga mga opisina nga ginpangunahan sang Committee on Transportation and Communication kag Committee on Local Government kaupod sang Land Transportation Office Region 6, Department of Transportation, Department of Public Works and Highways kag Department of Interior and Local Government.
Hugot nga ginsiling sang alkalde nga wala nagapangkumpiskar sang Drivers License ang mga katapo sang Public Order and Safety Unit apang sa kabaylo, ginahulam lang ang nasambit nga ID para sa mga kinahanglanon nga impormasyon nga ginabutang sa pag-isyu sang citation ticket.
Ginsiling man sini nga bangud sa reklamo nga kaangay indi makita ang mga signages, ginaplanuhan na ini nila nga padakuan. Nahibaluan nga sa gihapon ginahulat nalang nila ang findings sang amo nga reklamo sang duha ka mga nagpanguna nga committees.
Samtang, panugyan naman ni Eslabon sang mga motorista, ilabi nagid sa mga umalagi, mangin aware sa palibot kag magpahinay-hinay lang sa pagpadalagan sang mga behikulo agud nga malikawan ang kun ano man nga sahi sang insidente ang posible nga magluntad kag sundon ang ginapatuman nga ordinansa sa ila nga banwa para sa kaayuhan sang tanan.
Interviewed by Bombo Francis Biñas
