ROXAS CITY – Posible sindikato sa ilegal nga droga ang yara sa likod sang pagpatay sa isa ka Capizeño pulis nga ginluthang kag ginbuno sang riding-in-tandem sa ila nga balay sa Palmera Homes, Caloocan City.
Ini ang ginpahayag ni Lee Christian Castro, utod sang napatay nga biktima nga si PO2 Chris Robert Castro, nga na-assign sa Manila Police District Tondo Police Station 1 sang mainterview sang Bombo Radyo Roxas.
Suno kay Lee, bangud sa pagka-aktibo sang iya utod sa mga anti-drug operations, nakabaton na ini sang madamo nga pagkilala sa amo nga estasyon sang pulisya.
Nagapati ang pamilya nga isa sa mga nadakpan sang amo nga pulis ang yara sa likod sang pagpatay sa iya.
Sang nakaligad nga tuig lamang suno kay Lee sang isa ka kilala nga drug suspect ang ginpahilway nga una nga nadakpan sa operasyon nga ginpamunuan ni PO2 Castro.
Nagalaum naman ang pamilya sang nasambit nga pulis nga mahatagan sang hustisya ang kamatayon sang ila himata nga wala sang iban nga handum kundi ang makapanerbisyo sang tampad sa pungsod bilang alagad sang laye.
