ROXAS CITY-Ginpasalig sang talatapan sang Municipal Disaster Risk Reduction and Management Office (MDDRMO) sa banwa sang Sigma nga hatagan sang solusyon ang pagkatiphag sang duta sa river control sa Barangay Poblacion Norte kag Sur sa nasambit nga banwa.
Kasunod ini sang natabo nga soil erosion sa nasambit nga banwa.
Sa interview sang Bombo Radyo sa kay Mr. Ernesto Upod, Operations Officer-Municipal Disaster Risk Reduction and Management Office sang nasambit nga banwa ginkompirmar sini nga ang pagkatiphag sang duta sa river kontrol ang gintunaan sang soil erosion sa amo nga lugar.
Suno sa kay Upod nga amat-amat nga nagakalatiphag ang duta sa nasambit nga suba rason nga may pila ka mga panimalay ang naapektuhan kalakip ang panimalay sang isa opisyal sa barangay.
Bangud sini, ginpakamaayo sang MDRRMO sa mga residente nga magbiya na lamang sa ila tagsa ka mga panimalay.
Gin-athag ni Upod nga wala pa sa kritikal ng kondisyon ang nabuwang nga duta, apang delikado ini sa mga residente nga nagapuyo malapit sa lugar.
Samtang ginpalab-ut na ni Upod ang nasambit nga natabo sa talatapan sang Department of Public Works and Highways kag sa Provincial Disaster Risk Reduction and Manaement Office (PDRRMO) agud mahatagan sang nakaigo nga solusyon.
Mahibaluan nga kapin 5 ka mga panimalay ang apektuhan bangud sa pagkatiphag sang duta sa nasambit nga lugar.
