ROXAS CITY – Nagabaton na ang Social Security System (SSS) sa ila mga miyembro nga luyag mag-avail sang calamity loan matapos ang ginpaidalom ang probinsya sang Capiz sa state of calamity bangud sa paglaslas sang Bagyong Ursula.
Ini ang ginpahayag ni SSS Branch Head Rene Moises Gonzales sang mainterview sang Bombo Radyo Roxas.
Suno kay Gonzales nga nagadependi sa contribution kada bulan sang isa ka miyembro ang ma-avail nga calamity loan.
Apang ang maximum nga ma-avail nga loan ang nagadependi sa isa ka bulan nga sweldo sang isa ka miyembro.
Sa mga miyembro nga luyag mag-avail sang calamity loan mahimu lamang nga magpadulong sa SSS office kag magkuha sang application form.
Magkuha sang certification form sa Punong Barangay nga nagapamatuod nga na-apektuhan sang bagyo.
Magdala sang duha ka mga valid ID’s kag kinahanglan ang pirma sang employer.
Maghulat lamang sang duha ka semana para sa processing kag mahimu na nga mabaton ang imo nga calamity loan pinaagi sa pagkuha sang imo nga cheque sa talatapan sang SSS.
Nahibaluan nga nagsugod sa pagbaton sang calamity loan ang SSS sang Enero 15 kag magatakop ini sa Abril 14 sini nga tuig 2020.
