Tuman ang pagpasalamat sang isa ka Student Athlete matapos nakapasar ini sa ginpatigayon nga February 2026 Criminology Licensure Examination.
Sa interview sang Bombo Radyo kay Garnel Jess Delfin, tumandok sang West Villaflores Maayon, Capiz kag board passer sang February 2026 Criminology Licensure Examination, iya ginpahayag nga ang iya pamilya kag personal nga handom amo ang nangin dako nga inspirasyon agud nga makapasar sa nasambit nga exam.
Suno sa iya, indi nangin mahapos ang iya nga mga naagyan agud malab-ot ang amo nga kadalag-an, sa diin kinahanglan niya nga ipaiway ang iya nga vlogging agud makafocus sa pag-review.
Dugang pa niya, dako gid ang iya pagpasalamat nga nangin isa siya ka student athlete bangud amo ni ang nagbulig sa iya nga mapadayon niya ang iya pagtuon bilang isa ka scholar.
Pahayag pa sini, kada mabatyagan niya ang kapoy kag kabudlayan, naga pangamuyo gid siya sa Ginoo kag nagapangayo sang kusog kag kaalam agud nga malab-ot niya ang iya nga hamdom.
Nagpasalama man ini sa iya pamilya, partner kag abyan nga padayon nga nagsuporta sa iya.
Mensahe sini sa kaangay man nga estudyante kag magakuha sang exam, indi mag-untat sa paghandum, pagpangamuyo, magsalig sa ikasarang sang kaugalingon kag indi pagkalipatan nga atipanon ang kaugalingon.
