IVISAN, CAPIZ- Natalana nga pasakaan sang kaso ang isa ka lalaki matapos nga nadakpan sa ginpatigayon nga buybust operation sa Barangay Santa Cruz, Ivisan, Capiz.
Matandaan nga ginkilala ang nadakpan kay alyas “Jun”, 35-anyos kag residente sang Poblacion Norte, sa nasambit nga banwa.
Sa interview sang Bombo Radyo kay Police Major Ruby Magallanes, Hepe sang Ivisan Municipal Police Station, ginpahayag nga madugay na nila nga gina-monitor ang nasambit nga suspek bangud sa pagpatigayon sa iligal nga mga bulohaton.
Natigayon naman ini nga madakpan pamaaagi sa isa ka pulis nga nagpakuno-kuno poseur buyer.
Samtang, narekober sa amo nga suspetsado ang isa ka unit sang .38 caliber revolver, P500 buybust money, P2, 000 nga boodle money kag isa ka clutch bag nga naga duag sang grey.
Magapangatubang naman ini sa kaso nga paglapas sa Republic Act 10591 ukon (Comprehensive Firearms and Ammunition Regulation Act) kag paglapas sa Comelec Gun Ban.
Sa karon, nagapabilin ini sa kustodiya sang Ivisan Municipal Police Station para sa nagakaigo nga disposisyon.
With a report from Bombo Jessa Mae De Los Santos
