Ginpahayag ni Punong Barangay Arturo Aragon nga makabig problema sa ila barangay ang suspek nga nagpangbuno sa mag-amay sa Sitio San Isidro, Barangay Cagay, Roxas City.
Matandaan nga ginkilala ang mag-amay nga biktima nga sanday William Dafiles, 45-anyos kag Glenwel Dafiles, 21-anyos samtang ang ginatudlo nga suspek amu si Michael Baes, 47-anyos nga lunsay mga residente sang nasambit nga lugar.
Suno kay PB Aragon, magpamilya lamang ang suspek kag mga biktima apang nakaandan na sang magtimbang nga bahin nga mag-inom-inom kada hapon kag kun mahubog nagaminaoy.
Base sa mbestigasyon sang kapulisan samtang nagapahuway ang mga biktima sa sulod sang ila puluy-an, ginapahayag nga nagmaoy ang suspek nga hubog sa guwa kag nagasinggit kun sin-o ang maisog.
Bangud sini, una nga nagguwa ang bata nga biktima kag ginsaway kag ginsumbag ang suspek apang nagbalos ini kag ginbuno ang biktima nga naigo sa nawala nga butkon. Nagguwa man gilayon ang amay nga biktima agud sukmaan ang suspek sa iya ginhimo apang ginbuno man ini sang suspek kun sa diin naigo naman ini sa wala nga bahin sang tiyan.
Madasig naman nga gindala ang mga biktima sa hospital para sa nagakaigo nga pagbulong, samtang ang suspek nagapabilin sa kustodiya sang kapulisan para sa nagakaigo nga disposisyon.
