ROXAS CITY CAPIZ – Desidido nga magpasaka sang nagakaigo nga kaso ang tag-iya sang karne nga ginapahayag ginkawat sa Teodoro Arcenas Trade Center (TATC).
Sa interview sang Bombo Radyo kay Mr. Nilo Delos Santos sang Barangay Culasi, ginpahayag sini nga wala niya ginalauman nga kawaton ang iya pinamaklan bangud kumpiyansa siya kag indi lamang ini ang una nga bes nga nagpamakal sa merkado.
Suno kay Delos Santos, natatapan na lamang niya nga nadula na ang iya pinamaklan matapos makit-an nga isa na lamang ka sako bag ang yara sa sulod sang iya traysikol.
Mahibaluan nga ang nasambit nga sako bag ang naga-unod sang nanari-sari nga karne kag nagabalor sang masobra P3,000.00 kung sa diin ginbilin ini niya sa sulod sang traysikol nga nakahigot.
Sa karun, dako ang iya paglaum nga pinaagi sa CCTV footage makilan-an kag madakpan ang wala hadlok nga suspetsado.
