Tatlo na ang na-report nga napatay bangud sang paglaslas sang Super Typhoon Uwan.
Suno sa Office of Civil Defense (OCD), ang mga biktima ang naghalin sa Viga sa Catanduanes, Catbalogan City sa Samar, kag isa sa Bicol Region.
Suno kay OCD Deputy Administrator for Administration Assistant Secretary Bernardo Rafaelito Alejandro IV, naglab-ot na sa 1.4 million ka mga indibidwal ukon masobra 400,000 ka mga pamilya ang gina-evacuate sa mga safe nga lugar sa Metro Manila, Cordillera Administrative Region, Ilocos Region, Cagayan Valley, Central Luzon, Calabarzon, Mimaropa, Negros Island Region, Bicol, Western Visayas, Central Visayas, kag Eastern Visayas.
Dugang pa niya, ginabulubanta 1,000 ka mga pamalay ang nagkalaguba sa diin 996 ang partially damaged samtang 89 naman ang naubos gid wasak.
Nakaeksperyensya naman sang pagbaha ang 132 ka mga barangays,n akabatyag man sang storm surge ang pila ka mga coastal communities, kag may na-record man nga mga landslides.
Pahayag pa ni Alejandro, pila man ka kabanwahanan sa Aurora ang isolated ukon indi makadtuan bangud sa landslides, lakip diri ang banwa sang Dipaculao, Dinalungan, Casiguran, kag Dilasag.
Base sa latest Tropical Cyclone Bulletin Number 17 sang PAGASA, naghina ang Bagyo Uwan samtang padayon nga nagahulag palayo sa pungsod sa direksyon sang West Philippine Sea.
