Nakakas sa iya nga trabaho ang isa ka manunudlo sa Okayama, Japan matapos madakpan nga naga-sideline sa isa ka convenience store nga isa ka hilimuon nga paglapas sa kontrata sang madamo nga empleyado sa Japan, kalakip na ang mga public teachers.
Suno sa report, isa ka 60-anyos nga manunudlo ang nakit-an kag gin-report sa Okayama City Board of Education nga nagatrabaho sa isa ka convenience store.
Ginkumpirma ini sang iya nga school principal, nga personal nga nagpadulong sa convenience store, adlaw sang Sabado, sa diin adlaw sang pahuway sang manunudlo.
Sa Japan, kinaandan sa mga kontrata sa trabaho ang pagbawal sa pag-angkon sang pangaduha nga trabaho. Ang logic sa likod sini agud masiguro nga ang bug-os nga atensiyon kag enerhiya sang isa ka empleyado ang nakatutok sa iya nagapanguna nga trabaho.
Gin-ako sang manunudlo nga nagatrabaho siya sa convenience store halin pa sadtong November 2023 agud madugangan ang iya nga kita, matapos siya nga “i-rehire” sang iya nga ginatrabahuan nga eskuwelahan.
Ang “rehiring” isa ka hiring process sa Japan kun sa diin ang isa ka empleyado nga naglab-ot na sa retirement age ang liwat nga ginaempleyo para sa pareho nga posisyon apang may mas manubo nga sweldo.
Nagpangayo sang pasaylo ang manunudlo para sa iya indi ‘ethical’ nga hilimuon nga nakaguba sa pagsalig sang publiko sa mga manunudlo. Nag-sorry man ang Okayama City Board of Education sa ila nga mga estudyante.
Ang kaso nagresulta sang diskusyon online, kun sa diin madamo ang nagakuwestiyon sa patakaran sang pagbawal sa side job, ilabi na kun ini ang isa ka dungganon nga trabaho kag ginahimo sa guwa sang oras sang nagapanguna nga trabaho.
