Ginpakigbahin sang aktres nga si Kris Aquino ang iya nga sitwasyon sa ikaayong lawas samtang nagahimo ini sang isa ka dako nga desisyon sa kabuhi sa diin amo ang kabuhi ukon kamatayon.
Sa pinakabag-o sini nga post sa social media, ginsiling nya nga iya ginhungod ang indi pag-post sa iya nga social media accounts bangud sa pagkabalaka nga mahimo mag-untat sa pagpangamuyo ang iban sini nga mga tagasuporta bangud sa ang iya nga autoimmune diseases labi pa nga nagalala kag nagatuga sa iya sang tuman nga pagkabalaka sa diin nga suno sa iya nga amo ang nagtulod nga maghimo sang maisog nga desisyon sa kabuhi. Mabudlay suno sa iya nga batunon nga kada gab-I sa iya nga pagtulog ang magpaminsar nga basi wala na sang bwas para sa iya.
Gin-ako sang 54-anyos nga personalidad nga ang iya nga pagpabilin sa isa ka lugar sa luwas sang siyudad sa mga tinalikdan nga binulan ang nakabulig sa pagpakusog sang iya nga determinasyon agud himuon ang tanan niya nga masarangan para pakigbatuan ang iya nga mga autoimmune diseases. Ginpahayag ni Kris nga siya kag sang iya nga pamilya ang mag-ululupod sa Tarlac para sa nabilin nga bahin sang tuig bangud sa iya bag-o nga pagpabulong.
Pahayag ni Kris, kapin duha ka-bulan na sya nga naga-tinir sa isa ka private beach property nga ginpanag-iyahan sang mabuot kag heneroso nga pamilya nga may luyag suno sa iya nga mabalik ang iya nga kabaskog kag nagapabakod sa iya nga pagsalig sa maluluy-on nga gahom sang pagbulong sa iya sang Diyos.
Dugang pa sini, nag-angkon sya sang bag-o nga anom tubtob walo ka oras nga infusion session sa sulod sang anom ka-adlaw, nga amo suno sa iya ang isa sa mga makusog nga autoimmune immunosuppressants kalakip ang duha pa nga iban –isa ang ginatumar kada-adlaw kag isa ang ginapaagi sa injection nga amo suno sa iya ang dalayon nga makapaayo sang iya nga immunity. Ginsiling pagid sini nga magapaidalom sya sa preventive isolation sa sulod sang anom ka bulan sa diin nga maga-istar ini sya sa ila nga compound sa Tarlac upod sang iya mga kapamilyahan nga Cojuangco sa diin nga ila pa ini gintawag nga Alto.
