ROXAS CITY – Indi makapati ang tiayon sang Punong Barangay sang Cabugao Oeste sa banwa sang Panay, nga mapatay sa aksidente ang iya bana.
Ini bangud mahalong magmaneho ang two-termer nga Punong Barangay.
Sa interview sang Bombo Radyo kay Marilyn Biñas, asawa sang nagtaliwan nga si Barangay Kapitan Erwin Biñas, suno diri nga antes paman ang nagluntad nga aksidente, naglaong ang iya bana nga magahikot ini sa pagpasulod sang mga residente para sa Cash for work, kag pagkatapos sadto, naglaong man nga magapadulong sa Gobernador.
Ginpahayag sini nga wala makainom sang makahulubog nga ilimnon ang iya bana sang naglakat ini halin sa ila balay mga pasado alas-5 sa hapon.
Ginkakibot nalang sini ang balita nga mga pasado alas-8 sa gab-i, ginpahibalo nalang ini nga naaksidente ang iya bana.
Nahibaluan nga indi Mio nga sahi sang motor ang nagamnan nga i-maneho sang Kapitan bangud may yara ini nga Bajaj, kag duha palang ka bulan ang nasambit nga Mio.
Masakit man para sa ila bangud nagahalong ini sa iya balatian nga highblood, apang madula pa ini pinaagi sa isa ka aksidente.
Matandaan nga sandig sa pahayag sang backrider nga si Roel Bacelonia, nakainom sila sang makahulubog nga ilimnon kag padulong kuntani sa syudad sang Roxas, apang pag-abot Banica tulay, nadulaan sang kontrol sa manubela sa kurbadahon nga bahin sang karsada.
Nag-angkon sang patal nga pilas sa ulo ang Kapitan nga gintunaan sang iya kamatayon, samtang padayon nga ginabulong sa ospital si Bacelonia.
