PRESIDENT ROXAS, CAPIZ – Wala na sang plano nga magpasaka sang reklamo ang isa ka negosyante batuk sa tatlo ka mga suspek nga nagpangawat sa iya nga tindahan sa merkado-publiko sa banwa sang President Roxas.
Ang biktima ang ginkilala kay Rogie Panes sang Barangay Marita, sang nasambit man nga banwa.
Suno kay Punong Barangay Jeffry Dela Cruz sang Barangay Poblacion, ang mga suspek amo sanday Edgardo Patricio, 20 anyos kag duha ka mga menor-de-edad.
Ginkatingala na lamang ni Panes nga sa iya pag-abot, ginguba ang padlock sang iya store kag didto natukiban nga wala na ang mga sensilyuhon nga nagalab-ot sa P5, 000, 15 ka pakete sang sigarilyo, kag 9mm. calibre nga armas kalakip ang 18 tanan ka mga bala.
Boluntaryo man nga nagsungka ang mga suspek matapos nga nagsugid sa mga otoridad ang magulang sang isa sa mga suspek nga si Patricio.
Gin-ako man sang mga ini ang ginhimo kun sa diin sandig sa ila nga pahayag, nagserbi nga lookout sa guwa sang store si Patricio samtang ang duha ka menor-de-edad ang nagsulod kag nagpangamot sa pagpangawat.
Ang nakuha nga armas sang mga kawatan ang yara naman sa paghinakop sang mga otoridad matapos nga ginturn-over sang amay sang barkada sang mga suspek.
